Kulimale onogada ababili oshayasiibhamu begadla emotweni yemali kuR74 ngoMsombuluko
Image: IPSS Medical Rescue
Nonkululeko Nhlapo
KUDIDIZELE abashayeli bezimoto kuR74 uma uphuma KwaDukuza ubheke kuthelawayeka uN2 ngoMsombuluko ntambama oshayasibhamu bevimbezela imoto yemali.
Ngokwemibiko evela endaweni yesehlo, kuthiwa iqulu lamadoda abehlome ephelele livulele ngenhlamvu liphoqa ukumisa imoto yemali yakwaBidvest nokuyisenzo esilimaze onogada ababili.
Kuthiwa abasolwa basebenzise iziqhumane ukuvula isisefo semali kule veni ngaphambi kokuthi bashaye bachithe nemali.
Abezimo eziphuthumayo benkampani i-IPSS Medical Rescue bafike kule ndawo basiza onogada abalimele ngaphambi kokuba baphuthunyiswe esibhedlela esiseduze. Lokhu kuphoqe ukuvalwa kwalo mgwaqo amahora ambalwa amaphoyisa esaphenya.
Ukuhlaselwa kwale moto kulandela isigameko esenzeke ngesonto eledlule kuR102 phakathi kwaseMandeni naseDokodweni
Abasolwa abebehlomile bavulele ngenhlamvu emotweni ye-CIT kanye nemoto ebiphelezelwa, baphoqa imoto ephelezelwayo ukuthi isuke emgwaqweni ngaphambi kokusebenzisa iziqhumane ukuze ingene ngemuva kwemoto ye-CIT. Abasolwa babaleke nesamba semali esingadalulwanga kanye nezibhamu ezebiwe.Onogada ababili abebehamba ngemoto bathole imihuzukwana, baphuthunyiswa esikhungweni sezempilo esiseduze ukuze banakekelwe ngokwengeziwe ngabakwa-IPSS Medical Rescue.
Oshayasibhamu badudule imoto yemali ngenhlamvu yaze yaphuma emgwaqweni uR102 ngaphambi kokuba ziyigebenge.
Image: IPSS Medical Rescue
Related Topics: