Liyaqala ukuqulwa elokushaya elibhekene noBabes Wodumo

UQHUDE manikiniki zindala zombili phakathi kwendlovukazi yegqom' uBongekile "Babes Wodumo" Simelane nomsiki wengqephu, uPhilly Mhlongo eNkantolo yeMantshi yaseThekwini.

Kusukela ngoLwesibili kuyaqala ukuqulwa kwecala lokushaya elibhekene nalo mculi wodumo lwengoma esihloko sithi Wololo. Ngokuthola ngamaphepha asenkantolo, leli cala lizoqulwa amahlandla amathathu okungoLwesibili, uLwesithathu nangoLwesine.

Ngokomthombo osenkantolo, uBabes wabekwa icala ngezinsolo zokushaywa kwalo msiki wengqephu ebizwa ngeSK Dee Designs.

Umthombo waveza ukuthi uBabes wabekwa icala ngezinsolo zokushaya umsiki wengqephu ebizwa ngeSK Dee Designs, wabe esebizelwa enkantolo ngoJuni 27 nango-Okthoba 8, nyakenye, kodwa uBabes wangalubeka unyawo kwaze kwaba imantshi imkhiphela isexwayiso sokuba avele phambi kwayo.

Kuthiwa ummeli kaBabes wabe esenxusa uPhilly (34) ukuba lolu daba luxazululwe ngasese, okuyinto uPhilly athe akabanga nankinga nayo. UBabes noPhilly babe sebevela enkantolo ngo-Okthoba 14 ngaphambi kokuba imantshi ihlele izinsuku zokuqulwa kwaleli cala ngoJanuwari 14, 15 no-16.

Umthombo uthe uBabes ungaphandle ngesexwayiso ngenxa yokungafiki enkantolo izinsuku ezimbili.

Kuze kugqigqiswane ezinkantolo nje, uPhilly wavulela uBabes icala lokushaya nelokumhlambalaza emuva kwezinsolo zokumhlasela lapho esebenzela khona kuWest Walk, eThekwini, ngoMashi 12 nyakenye.

UPhilly noBabes babe sebebizelwa enkantolo esePoint, ngoJulayi 11 ngonyaka ofile, ngenhloso yokuzwa ukuthi babangani.

UPhilly wathi okumenze wabopha uBabes yingoba efuna ukumnqanda ekukhulumeni ngaye ezinkundleni zokuxhumana nasemithonjeni yezindaba ngoba udicilela phansi isithunzi sebhizinisi lakhe.

Kwaze kwaba ne-vidiyo kaBabes noPhilly bebambana ngezandla kwaze kwaba ngamahlandla amabili.

UPhilly wathi ingxabano phakathi kwakhe noBabes yasuswa ngabadansi bakhe abafika kuye ngoFebhuwari 28 nyakenye, befuna izingubo ababezozigqoka engqungqutheleni yeNkatha.

“Babezifuna mahhala. Babengenayo imali, bashiya u-R150 bebabili, okuyimali engenele. Isivumelwano sethu kwakuwukuthi bazozibuyisa ngakusasa kodwa abangazibuyisa."

UPhilly wathi abadansi baqhubeka nokuzigqoka ngisho sesidlulile isikhathi ababevumelene ngaso.

UBabes waphendula nge-vidiyo kwiFacebook, wavuma ukuthi bayile lapho kusebenzela khona uPhilly bezobuza ukuthi ungena kuphi yena uma exabene nabadansi bakhe kodwa uPhilly wamphendula ngenhlamba, embiza ngesife** somfelokazi maqede wathuka noyise. Wathi akasibonanga isidingo sokubopha uPhilly ngoba "akabalulekile ngaleyo ndlela".