UMNUZ Thokozani Mncwabe, uMnuz Lizwi Ncwane abangaphansi koNyazilwezu noMshumayeli Thetha Ngiba wasekuPhakameni abebeseNkantolo eNkulu eThekwini izolo Isithombe: THOKOZANI NDLOVU
IMBIBIZANE kumaNazaretha aseGinyezinye, abezimisele ngokuqwala kuqala intaba eNgcwele iNhlangakazi ngoJanuwari, echithwa yiNkantolo eNkulu yaseThekwini, njengoba sekumele kube yiwona anyuka kugcina.
INkantolo eNkulu ichithe isicelo sikaNgqogqoshe wamaPhoyisa waseNingizimu Afrika, uMnuz Senzo Mchunu esicelweni abesifake enkantolo ngohlelo lokunyuka intaba kwamaNazaretha ngoJanuwari.
Ngokwesicelo sikangqongqoshe, bese kunohlelo obelwakhiwe obelubeka phambili abaseGinyezinye, ukuthi yibona abazonyuka kuqala.
Kulesi sicelo ungqongqoshe ubenxusa nokuthi kuhlelwe izinsuku zokunyuka intaba ngokushintshana kuze kufike u-2030. Lokho kungenxa yokuthi njalo uma sekumele kunyukwe intaba kuba nomsindo ngozonyuka kuqala.
Ngemva kwezethulo ezenziwe ngabameli enkantolo izolo, begqamisa ukubaluleka kwalolu hambo, bakubeke kwacaca ukuthi ungqongqoshe akakwazi ukuthathela amaNazaretha isinqumo.
Ijaji ebelisingethe leli cala, uMuzikawukhelwana Ncube, lizamukele izethulo zabameli lase likhipha isinqumo.
“Asikho isidingo sokuthi kwenziwe uhlelo oluzoze lufike ku-2030. Okwamanje singakhuluma ngo-2025 kuphela ngoba asizazi izimo ukuthi zizobe zinjani eminyakeni elandelayo. Asikwazi ukuthi sinqume ukuthi uhlelo lume ngale ndlela okucelwa ngayo ekubeni ikusasa lingaziwa,” kusho iJaji uNcube.
Libe selikhipha isinqumo sokuthi abebengabesibili banyuke kuqala, lase liyalela amaNazaretha ukuthi ahlale phansi axoxisane ewodwa ngalokho ngenxa yokuthi uhambo lwasentabeni lungolwamakholwa.
Ngokohlelo olusha emva kwesinqumo senkantolo, abasekuPhakameni abaholwa yiNkosi Vukile Shembe Incoyincoyi, bazonyuka ngoJanuwari 2, babuye ngomhlaka 8, abaseBuhleni abaholwa yiNkosi uMduduzi Shembe uNyazilwezulu, bazonyuka ngoJanuwari 5, baze babuye ngomhlaka 24, kuthi abaseThembezinhle abaholwa yiNkosi Phinda Shembe Ukukhanyakwelanga, banyuke ngoJanuwari 9, babuye ngomhlaka 15 bese kugcina iGinyezinye ezonyuka ngoJanuwari 16, ibuye ngomhlaka 22.
AbaseBuhleni banalezi zinsuku ezikhethekile ngoba vele abasayi entabeni iNhlangakazi, kodwa iNkosi uNyazilwezulu lwahlonza iKhenana lamaNazaretha, okuyintaba entsha azonyukela kuyona ngoJanuwari amaNazaretha angaphansi kwakhe.
Okwenza amaNazaretha oNyazi abe sohlwini lwezingxoxo kungenxa yokuthi wonke amaNazaretha asebenzisa indlela eyodwa uma kuyiwa entabeni bese wona ehluka uma esenyukela eKhenana.
Kuthintwa uMfundii Joseph Mhlongo waseGinyezenye, uthe okwamanje akukho abazokuphawula ngesinqumo kuze kube abameli babo babathulela lonke udaba oluqhubeke enkantolo.
Inhlalisuthi yoNyazilwezulu, uMnuz Lizwi Ncwane, uthe bajabule kakhulu ngesinqumo.
“Okuphinde kusijabulise kakhulu ukuthi usuku ebesithe sizonyuka ngalo aluzange luphazamiseke. Isicelo sikangqongqoshe sihlehliselwe usuku olungaziwa,” kusho uNcwane.
UMshumayeli Thetha Ngiba wasekuPhakameni, uthe abaseGinyezinye bazoba ekugcineni njengoba vele behlala beba ekugcineni uma kunyukwa intaba. Sethemba ukuthi noma sesixoxisana singamakholwa, abaseKuphakameni, bazohlala kuyibona abanyuka kuqala intaba njengoba kuhlala kwenzeka,“ kusho uMshumayeli uNgiba.
Related Topics: