Izingwazi ezizosina zidedelana kuleli

UNYAKA ophelile abantu baseNingizimu Afrika bawuvale ngamakhonsathi ezihlabani zomculo ezidume umhlaba, okubalwa kuzo iBoyz II Men, Tamia, Bebe Winans, Kendrick, Freddie Jackson, Chris Walker, Regina Bell nabanye.

Kulo nyaka bazozitika ngolozolo lomculo wezingwazi zeR&B, uJoe Thomas noJeffrey Osborne.

UJoe uzonandisa eSun City Superbowl ngo-Ephreli 27, adlulele eGrandWest Arena, eCape Town ngo-Ephreli 28 bese imbenge eyisonga eSunBet Arena, ePitoli ngo-Ephreli 30.

Kulindeleke ukuba uJoe angaphumi esteji engawaqhululanga amanoni aziwa ngawo, okubalwa kuwo athi All That I Am, All The Things (Your Man Won't Do), More & More, Thank God I Found You, Good Girls, No One Else Comes Close nelithi I Wanna Know.

Umhleli walo mcimbi, uThato Segoale weVertex Events, uthe bakujabulele kakhulu ukubuyisa lesi sihlabani kuleli.

Uthe bafuna ukuqinisekisa ukuthi uphuma esteji abantu besahalela impinda ngenxa yezinga lesiteji nezinsimbi.

UJeffrey uzoqala eCape Town GrandWest Arena ngoMashi 20, adlulele ePietermaritzburg Athletic Stadium ngoMashi 24 naseSunBet Arena, ePitoli ngoMashi 28 bese uchungechunge lwamakhonsathi akhe elusonga eJohannesburg Emperors Palace ngoMashi 29.

UJeffrey uzakhele udumo emhlabeni wonke jikelele ngamanoni athi You Should Be Mine, On The Wings Of Love, Back In Love Again, The Family nelithi Stranger.

UJeffrey ucashunwe ethi ukuthakasele kakhulu ukuzonandisa kuleli okokuqala ngqa futhi ufuna ukukhipha wonke amangwevu.

Amathikithi okuthamela le micimbi aseyatholakala eTicketPro naseWebtickets.