UNatasha Thahane noThembinkosi Lorch
ISILOMO ebesingumdlali we-Orlando Pirates, uThembinkosi “Nyoso” Lorch asihlukananga neqembu kuphela, ebese sihlale kulona iminyaka kodwa nocu alusahlangani phakathi kwaso nesinqandamathe esingumlingisi, uNatasha Thahane.
ULorch ushaqise abaningi eshiya iPirates ejoyina iMamelodi Sundowns sekusele kancane kuvalwe iwindi lamaphakathi nesizini lokuhwebelana ngabadlali.
Ngempelasonto udlale ugijime emdlalweni wakhe wokuqala kwiKabo Yellow ibambana ngo 1-1 nePirates koweDStv Premiership, ePitoli.
Izindaba zokuhlukana kwakhe noNatasha ziqinisekiswe ngumlingisi esitatimendeni asifake ku-Instagram ngoMsombuluko emini.
“Mina noThembinkosi Lorch sesithathe isinqumo sokuhlukana kwezothando. Yize kunoshintsho ebudlelwaneni bethu kodwa sizoqhubeka sibe ngabangani futhi sibambisane njengabazali,” kubhala uNatasha.
Laba bobabili bebelokhu besolwa ngokuba sebudlelwaneni yize bengakaze bephumele obala beqinisekise ukuthi bayathandana.