Kuphakathi kwekaMjolisi neGcokama kwezohlukanisa unyaka

KUPHAKATHI kwengoma kaMjolisi ethi My Dululu noma ekaMthandeni iGcokama Elisha Manqele ethi Gucci, kwezizohlukanisa unyaka namhlanje uma zithi-12 ebusuku emsakazweni uKhozi FM.

Umculo kamaskandi akungabazeki ukuthi uzophinde uqophe umlando kulo msakazo njengoba sekujwayelekile ukuthi omaskanda bakhiphe izingoma ezijatshulelwa abaningi futhi zithole ithuba lokungena kweziyishumi ezihamba phambili onyakeni kulo msakazo.

UMjolisi othe uneminyaka emithathu esendimeni yomculo, uveze ukuthi kummangazile ukuthola ithuba elifana naleli futhi ubabonga uyanconcoza abalandeli bakhe abamvotelile.

“Angibongi nje kuphela abalandeni bami, nabo bonke abantu abezwe ingoma yami ukuthi ikhona kweziyishumi ezizohlukanisa unyaka emsakazweni Ukhozi FM, bazinikela bavota, ngibona angiqedi. Ngiwumculi osemncane kakhulu ukuqhathwa nabo bonke abaculi abakhona kulolu hlu. Lokhu kungenze ngabona ukuthi usemningi umsebenzi ongimele, kodwa okukhulu kakhulu ukuthi ngingenile futhi senza konke okusemandleni ukuthi sivote,” kuchaza yena.

Uveze ukuthi noma sekungenzekani ngo-12 ebusuku, ngeke asole muntu njengoba esebenze ngokuzikhandla.

Ekhuluma neSolezwe kuqala lo mkhankaso, uMthandeni waveza ukuthi uzokhankasela ukuthi ingoma yakhe i-Gucci ihlukanise unyaka ngoba uzwile ukuthi kunabakhala ngokuthi akakhankasi.

"Iyangijabulisa le nto yokuthi namhlanje noma kulezi zinsuku seniyakwazi bafowethu ukuhlala nathi kanje uthole umqondo weqhawe ukuthi linjani. Uyabona nje lapha ezinkundleni zenu zokuxhumana kunabantu abanigqisha ukuthi uMthandeni uyafuna ukuhlukanisa unyaka. Bafowethu kufuna nina. Uma sekufune nina kungafezeka ngenxa yokuthi ningabelungu bami. Uma nijabule nami ngiyajabula," kusho uMthandeni.

Ingoma kaMthandeni amasonto okugcina elandelana iyona ebihamba phambili.

Izingoma ezisembangweni yilezi:

A. Woodblock DJs – Skuta Baba

B. Thokozani Langa – Thokoza

C. Mthandeni SK ft Mawhoo – Gucci

D. Allen ft Big Zulu, Charlotte Lyf & Master KG- Unobuhle

E. Malungelo ft Rethabile Khumalo, Nokwazi & DJ ALE - Uyavela

F. Malini – Uthunyelwe abadala

G. Mjolisi ft Mnqobi Yazo- My Dululu

H. Black Major – Sdakiwe Sbali

I. Andile KaMajola – Liphakanyisiwe

J. Zintle Kwaaiman feat. Mpumi & TorQue MuziQ - Sabela

Kudalulwe ukuthi umculi wengoma ehlukanisa unyaka uzowina i-VW Polo Vivo Life, ebiza u-R288 500.

Isolezwe lizame kaningi ukuthola ukuthi obani abasakazi abazozwakala uma sekusakazwa izingoma ezihamba phambili.

Umthombo weSolezwe uthe yize bengakaziswa lutho kodwa amagama oTshatha, Selbeyonce, Sipho Mbatha noMroza kuhlanjeliswa kuwo.