Ukuphindile lokho uMphakathi edla iCity 2 City Marathon
Unqotshwe nguNtsindiso “Tata” Mphakathi umjaho iCity 2 City Marathon obusuka ePitoli waphelela eGoli ngeSonto ekuseni.
UMphakathi ogijimela iqembu i-Entsika unqobe lo mjaho ka-50km ngesikhathi esingu- 02:52:28.
Ubelandelwa ezithendeni nguJackson Ole Koisenge oqede ngo-02:52:46 kwathi endaweni yesithathu kwaba nguTebogo Pulusa ngesikhathi esingu-02:53:46.
UMphakathi unqoba lo mjaho nje, ngoNovemba udle umhlanganiso kwi-African Bank Soweto Marathon ngesikhathi esingu-02:21:13. Ngaphambi kwalokho wadla umhlanganiso kwiPrince Mangosuthi Ultra Marathon.
Usanda kutshela Isolezwe ukuthi ngeke aze ayigijime kulo nyaka iPrince Mangosithu Ultra Marathon ezoba ngoMeyi ngenxa yokuthi uhlele ukugijima iTotalsports Two Oceans Marathon ezoba seKapa ngo-Ephreli 13 neComrades Marathon ngoJuni 9.
Akucaci ukuthi usazoyigijima yini iTwo Oceans ngoba isisondele futhi negama lakhe aliveli ohlwini lwabagijimi kodwa kolweComrades liyavela.
Kwabesifazane uShelmith Muriuki uvule igebe washaya intambo ngo-03:13:04. Ulandelwe nguNobukhosi Tshuma oqedee ngo-03:30:37 kwathi endaweni yesithathu kwangena uDeane Laubscher ngo-03:31:33.
Lo mjaho ubukhuza ibuya ngemuva kweminyaka eyisithupha wagcina ukuba khona.
UMphakathi noMuriuki bahlomule ngoR200 000 umuntu ngamunye ngokunqoba, abalale endaweni yesibili bathole uR100 000 kwathi abasendaweni yesithathu bathola uR50 000.
Kuthiwa umgijimi weHollywood Athletics Club, uCian Oldknow akuwuqedanga umjaho eyeka esagijime u-42km.
Lo mgijimi, owaziwa kumabanga amafishane, usethubeni lokumela iNingizimu Afrika kuma-Olympics eParis ngasekupheleni konyaka ngemuva kokuqopha isikhathi esingu-02:25:05 emjahweni ka-42km iSeville Marathon.
Komunye umjaho obungeSonto iHarry Gwala District Marathon, kukhonye uMholi Jali weXcel AC enqoba ngesikhathi esingu-02:33:45. Ushiye uKabelo Lesiya oqede endaweni yesibili ngo-02:34:34 kwathi endaweni yesithathu kwangena uNkosikhona Mhlakwana ngo-02:35:05.
Kwabesifazane kunqobe u-irine Loritarency ngo-02:58:49. Endaweni yesibili kungene uSheila Saina ngo-03:02:22 kwathi endaweni yesithathu kwaba nguMonicah Jepkorir Mengich ngo-03:11:26.
Emjahweni ka-21.1km kuwine uLebenya Nkoka ngo-01:11:42 kwabesifazane kwanqoba uJenet Mbhele ngo-01:23:24.